Tuesday, April 18, 2023

உயிரே போனாலும் உரிமையை விட்டுக்கொடுக்க மாட்டோம்" - போராட்டத்தில் மீனவ பெண்கள்

 

சென்னை மீனவர்கள்
படக்குறிப்பு,

கோப்புப் படம்

  • எழுதியவர்,க. சுபகுணம்
  • பதவி,பிபிசி தமிழ்

“1984ல எம்ஜிஆர் துப்பாக்கி சூடு நடத்தவே உத்தரவு கொடுத்தாரு. அப்பவே எதிர்த்து நின்னு உயிரைத்தான் விட்டோமே தவிர, எங்க இடத்தை விட்டுக்கொடுக்கல. என்னவோ நாங்க இப்பதான் இங்க வந்த மாதிரி பேசுறாங்களே, உங்களுக்கு இந்த ரோடு என்ன சொந்தமானு கேட்குறாங்களே! ஆமா, இது எங்க ரோடுதான். நாங்க உயிரையேகூட விடுவோம், ஆனா இந்த மண் மீதான எங்க உரிமைய விட்டுக்கொடுக்க மாட்டோம்,” என்று சென்னையின் லூப் சாலையில் சாலையோர மீன் கடையை வைத்திருக்கும் முல்லைக்கொடி உணர்ச்சி பொங்கப் பேசினார்.

மீன் கடைகளை நெருங்கியிருந்து பார்த்தவர்களுக்கு அதன் தனித்துவமான அழகு தெரியும். “வஞ்சரம், காலா, மத்தி, அயிர, நண்டு, பாற, இறா” என்று மீன்களின் பெயர்களை மீனவப் பெண்கள் கூவி விற்பதையே ஒரு கவிதையாக வடிக்கலாம்.

அப்படிப்பட்ட ஒரு கவிதைக்குத்தான் ஆபத்து வந்திருப்பதாக சென்னை மெரினா கடற்கரை பகுதியிலுள்ள லூப் சாலையில் அந்தப் பகுதியைச் சேர்ந்த மீனவ மக்கள் போராடிக் கொண்டிருக்கிறார்கள்.

அங்கு வழக்கமாக இரண்டு விதமான வேலைகள் நடக்கும். மீன் வாங்க வரும் வாடிக்கையாளர்கள் கேட்கும் மீன்களை மீனவப் பெண்கள் விற்பனை செய்வார்கள். அடுத்ததாக, அப்படி விற்கப்படும் மீன்களை வெட்டிக் கொடுப்பதற்காக மீன் வெட்டும் பெண்களும் அங்கேயே அமர்ந்திருப்பார்கள் 

மீனவர்கள் போராட்டம்

மீனவர்கள் தொடர் போராட்டம்

சென்னை உயர்நீதிமன்ற உத்தரவை அடுத்து மாநகராட்சி அதிகாரிகள், காவல்துறை உதவியுடன் மெரினா லூப் சாலையில் உள்ள ஆக்கிரமிப்பு கடைகளை அகற்றும் பணியில் ஈடுபட்டனர். அப்போது மீன் வியாபாரிகள் அதற்கு எதிர்ப்பு தெரிவித்தனர்.

ஆனால், உயர்நீதிமன்ற உத்தரவு என்று கூறி, மாநகராட்சி ஊழியர்கள் கடைகளை அகற்றத் தொடங்கினர். இதற்கு எதிர்ப்பு தெரிவித்து அப்பகுதியைச் சேர்ந்த 300க்கும் மேற்பட்ட மீனவர்கள் சாலையில் மீன்களைக் கொட்டி போராட்டத்தில் ஈடுபட்டனர்.

இந்நிலையில், இன்று இந்தப் பிரச்னை தொடர்பாக மீனவ மக்கள் கையெழுத்து இயக்கத்தை முன்னெடுத்தனர். நூற்றுக்கும் மேற்பட்ட மீனவக் குடும்பங்களிடம் கையெழுத்து பெற்று அரசிடம் மனு அளிப்பதற்கான முயற்சியில் ஈடுபட்டிருந்தனர்.

இந்த நேரத்தில், மீனவப் பெண்கள் தங்களிடம் மீதம் இருந்த சொற்ப அளவிலான மீன்களை விற்று முடித்துவிடலாம் என்ற எண்ணத்தில் லூப் சாலையில் வியாபாரத்திற்கு அமர்ந்ததாகவும் அதற்கு அனுமதிக்காமல் அவர்களுடைய மீன் வைக்கும் ஐஸ் பெட்டி, கூடைகள் ஆகியவற்றை போலீஸ் அப்புறப்படுத்தியதாகவும் அந்தப் பகுதியில் இருந்த மீனவப் பெண்கள் பிபிசி தமிழிடம் தெரிவித்தனர்.லூப் சாலையில் இருந்த மீன் கடைகளை அகற்றிய நடவடிக்கையால் ஆத்திரமடைந்த மீனவர்கள் தங்களுடைய ஃபைபர் படகுகளை சாலையின் நடுவே போட்டு, சாலை மறியலில் ஈடுபட்டார்கள்.

அதுகுறித்துப் பேசிய தென்னிந்திய மீனவர் சங்கத்தின் தலைவர் கே.பாரதி, “நாங்கள் இதுகுறித்து சட்டரீதியான நடவடிக்கையை முன்னெடுத்துள்ளோம்.

அப்படியிருக்கும்போது, வெறுமனே கிடக்கும் ஐஸ் பெட்டிகளையும் மீன் கூடைகளையும்கூட அப்புறப்படுத்த முயல்வது, ஏற்கெனவே மன உளைச்சலில் இருக்கும் மீனவ மக்களைச் சீண்டிப் பார்க்கும் செயல்,” என்று பிபிசி தமிழிடம் பேசியபோது தெரிவித்தார்.

மேலும், “இதுகுறித்து நீதிமன்றத்தில் மேல்முறையீடு செய்கிறோம், ஆகவே எதுவாக இருந்தாலும் அங்கு பேசிக் கொள்ளலாம் எனச் சொல்லியும் மீண்டும் மீண்டும் வந்து பிரச்னையை உண்டாக்குகிறார்கள்.

அதனால்தான் படகுகளை சாலையின் குறுக்கே போட்டுவிட்டு, நாங்கள் மறியலில் அமர்ந்தோம். இதைச் செய்ய வைத்தது அதிகாரிகள்தான்,” என்று தெரிவித்தார்.

மீனவர்கள் போராட்டம்

கடற்கரைக்கு அழகே மீனவர்கள்தான்

“நாங்க இதே இடத்துலதான் தலைமுறை தலைமுறையா வாழ்றோம். என் பாட்டன், தாத்தன் தொடங்கி, இப்போ என் பிள்ளைகள் வரைக்கும் மீன்பிடித் தொழிலைத்தான் செஞ்சிட்டு வராங்க.

எங்க வீட்டு ஆம்பளைங்க மீன் பிடிச்சுட்டு வந்தா, அந்த மீன்களை நாங்க இங்க கொண்டாந்து விற்போம். அதை வித்துதான் சோறு போட முடியும், குடும்பம் நடத்த முடியும். அந்த மீனை விற்கவிடாம, கீழ கொட்ட வெச்சாங்கனா நாங்க எங்க போய் பிழைக்குறது?” என்கிறார் நொச்சிக்குப்பம் பகுதியைச் சேர்ந்த மீனவப் பெண் கல்யாணி.

“கணவரை இழந்த பெண்கள், குடிப்பழக்கத்திற்கு அடிமையான கணவரால் துன்பப்படும் பெண்கள் என்றும் பலரும் இங்க மீன் வெட்டிக்கொடுக்குற வேலையைச் செய்ய வராங்க. அவங்க நிலைமை என்ன ஆகுறது?” என்று கேள்வியெழுப்புகிறார் கல்யாணி.

“எங்கள் வாழ்க்கையே கடலும் கடற்கரையுமாக இருக்கும்போது, அந்தக் கரையோரத்தில் கடை வைக்காமல் வேறு எங்கு சென்று வைப்பது?” என்று கேள்வியெழுப்புகிறார் முல்லைக்கொடி.

மேற்கொண்டு பேசியவர், “கடற்கரையோட அழகை நாங்க கெடுக்குறதா சொல்றாங்க, ஆனா அவங்க எல்லாம் இங்க வரதுக்கு முன்னாடியே, பல தலைமுறைகளாக இங்க வாழ்ந்துட்டு இருக்கும் மீனவர்கள்தான் இந்தக் கடற்கரைக்கே அழகு,” என்றும் கூறுகிறார்.


Copy paste BBC TAMIL

Detail

தந்தை பெரியார் முழு முதல் வாழ்க்கை வரலாறு PDF

 தந்தை பெரியார் அவர்களின் வாழ்க்கை வரலாறு எழுதிய கவிஞர் கருணானந்தம் அதன் முழு PDF Book Free






Download Link



Detail

Saturday, April 15, 2023

சாதி ஆணவக் கொலை: கிருஷ்ணகிரி அருகே மகன், தாயை வெட்டிக் கொன்ற கொடூரம் - மருமகள் படுகாயம்

 




 கிருஷ்ணகிரி அருகே சாதி மறுப்புத் திருமணம் செய்து கொண்ட மகனை அவரது தந்தையே வெட்டிக் கொன்றதாகவும் தடுக்க முயன்ற தனது தாயையும் அவர் கொலை செய்ததாகவும் அவரது தாக்குதலில் படுகாயமடைந்த மருமகள் கவலைக்கிடமான நிலையில் சிகிச்சை பெற்று வருகிறார் என்றும் குற்றம்சாட்டப்பட்டுள்ளது.

கிருஷ்ணகிரி மாவட்டம் ஊத்தங்கரை அருகே உள்ள அருணபதி கிராமத்தைச் சேர்ந்தவர் தண்டபாணி. இவரது மகன் சுபாஷ், திருப்பூரில் பனியன் கம்பெனி ஒன்றில் பணிபுரிந்து வந்துள்ளார். அப்போது உடன் பணிபுரிந்த, வேறு சாதியைச் சேர்ந்த அனுசுயா என்ற பெண்ணை அவர் காதலித்துள்ளார்.

சாதியை காரணம் காட்டி மகனின் காதலுக்கு தண்டபாணி எதிர்ப்பு தெரிவித்துள்ளார். காதலைக் கைவிடுமாறு சுபாஷிடம் அவர் வலியுறுத்தியுள்ளார். ஆனால், தந்தையின் வார்த்தைகளை நிராகரித்து விட்ட சுபாஷ் இரண்டு வாரங்களுக்கு முன்பு அனுசுயாவை திருமணம் செய்து கொண்டுள்ளார்.

மணமாகி 15 நாட்களுக்குப் பிறகு, தமிழ்ப் புத்தாண்டை முன்னிட்டு நேற்று சொந்த ஊரான அருணபதி கிராமத்தில் தனது பாட்டி கண்ணம்மா(தண்டபாணியின் தாய்) வீட்டுக்கு சுபாஷ் தனது மனைவியை அழைத்துக் கொண்டு சென்றுள்ளார்.

இதை அறிந்து அங்கு சென்ற தண்டபாணி, அரிவாளைக் கொண்டு தனது மகன் சுபாஷ், மருமகள் அனுசுயாவை சரமாரியாக வெட்டியுள்ளார். இதைத் தடுக்க முயன்ற தனது தாய் கண்ணம்மாவையும் தண்டபாணி தாக்கியுள்ளார் என்று போலீஸ் வட்டாரங்கள் கூறுகின்றன.

மூன்று பேரும் ரத்த வெள்ளத்தில் சரிந்த நிலையில் தண்டபாணி அங்கிருந்து தப்பி ஓடிவிட்டார். இந்தத் தாக்குதலில் தண்டபாணியின் மகன் சுபாஷ் மற்றும் அவரது தாய் கண்ணம்மா ஆகிய இருவரும் உயிரிழந்தனர். மருமகள் அனுசுயா படுகாயங்களுடன் கவலைக்கிடமான நிலையில் மருத்துவமனையில் சிகிச்சை பெற்று வருகிறார்



மகனையும், தாயையும் ஆணவக் கொலை செய்ததாக குற்றம்சாட்டப்பட்டுள்ள தண்டபாணி

அனுசுயா காயங்களுடன் தப்பியது எப்படி?

பாட்டி கண்ணம்மாவின் வீட்டிற்குச் சென்ற மகன் சுபாஷையும் மருமகள் அனுசுயாவையும் தண்டபாணி சரமாரியாக தாக்கியுள்ளார். அப்போது, வெட்டுக்காயங்களுடன் ஒருவழியாக வீட்டை விட்டு வெளியே தப்பி வந்த அனுசுயாவை பொதுமக்கள் காப்பாற்றியுள்ளனர். மக்கள் கூடுவதைக் கண்டதும் தண்டபாணி தப்பி ஓடிவிட்டார் என்று உள்ளூர்வாசிகள் கூறுகின்றனர்.

அனுசுயாவை மீட்ட பொதுமக்கள் ஊத்தங்கரை அரசு மருத்துவமனையில் அவரை அனுமதித்துள்ளனர். உயிருக்கு ஆபத்தான நிலையில் அனுமதிக்கப்பட்ட அவருக்கு அங்கே தீவிர சிசிகிச்சை அளிக்கப்பட்டது.

இதுகுறித்து தகவல் அறிந்த ஊத்தங்கரை குற்றவியல் நடுவர் நீதிமன்ற நீதிபதி, மருத்துவமனைக்குச் சென்று அனுசுயாவிடம் வாக்குமூலம் பெற்றார்.

தொடர்ந்து கவலைக்கிடமான நிலையில் உயிருக்குப் போராடிக் கொண்டிருந்த அனுசுயா, மேல் சிகிச்சைக்காக கிருஷ்ணகிரி அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டார்.

இந்தச் சம்பவம் குறித்து போலீசார் வழக்குப்பதிவு செய்து, தண்டபாணியை தீவிரமாகத் தேடி வருகின்றனர்.

எஸ்.சி, எஸ்.டி பிரிவின் கீழ் வழக்கு, கொலை வழக்கு, உள்ளிட்ட (307, 302) மூன்று பிரிவுகளின் கீழ் வழக்குப் பதிவு செய்யப்பட்டுள்ளதாகவும் விசாரணை நடைபெற்று வருவதாகவும் விசாரணை அதிகாரி ஆய்வாளர் பார்த்தீபன் பிபிசி தமிழிடம் தெரிவித்தார்.

சமூக ஊடகங்களில் பிபிசி தமிழ் copy paste

Detail

அண்ணாமலை 'திமுக ஃபைல்சில்' சாரமில்லை என விமர்சனம்: ஊழல் புகார் சுமத்த அடிப்படையாக என்ன வேண்டும்?




 தமிழ்நாடு முதல் அமைச்சர் மு.க.ஸ்டாலினின் மகனும், விளையாட்டுத்துறை அமைச்சருமான உதயநிதி ஸ்டாலின் உள்ளிட்ட திமுக தலைவர்களுக்கு 1.34 லட்சம் கோடி ரூபாய் அளவுக்கு சொத்துகள் இருப்பதாக நீண்ட பட்டியலை வெளியிட்டுள்ளார் தமிழ்நாடு பாரதிய ஜனதா கட்சியின் தலைவர் அண்ணாமலை.

சில பக்கங்கள் அடங்கிய அந்தப் பட்டியலை திமுக ஃபைல்ஸ் என அவர் அழைக்கிறார். இதில் தமிழ்நாடு அமைச்சர்கள் துரைமுருகன், எ.வ.வேலு, க.பொன்முடி, வி.செந்தில் பாலாஜி, முன்னாள் மத்திய அமைச்சர் எஸ்.ஜெகத்ரட்சகன் உள்ளிட்டோரின் பெயர்கள் மற்றும் அவர்களின் சொத்து மதிப்புகள் என்று கூறி சில தகவல்கள் இடம்பெற்றுள்ளன.

சென்னையில் ஏப்ரல் 14ஆம் தேதி நடந்த செய்தியாளர் சந்திப்பில் பேசிய அண்ணாமலை, குறிப்பாக தமிழ்நாட்டில் முந்தைய திமுக ஆட்சியில் 2011 சட்டமன்ற தேர்தலுக்கு முன்னதாக மு.க. ஸ்டாலின் துணை முதல்வராக இருந்த காலகட்டத்தில் நடந்த சென்னை மெட்ரோ ரயில் ஒப்பந்தத்தை பெறுவதற்கு ஒரு நிறுவனத்திற்கு ஆதரவாக ரூ. 200 கோடி ரூபாய் லஞ்சம் பெற்றதாக குற்றம்சாட்டினார்.

"நிழல் நிறுவனங்கள் மூலம் இந்த பணம் திமுகவுக்கு செலுத்தப்பட்டது," என்று அவர் குறிப்பிட்டார். அதில் ஒரு நிறுவனம் அமெரிக்காவில், "ஊழல் தொடர்பாக விசாரிக்கப்பட்டது," என்றும் அவர் கூறினார்.

திமுக எதிர்வினை

அண்ணாமலையின் குற்றச்சாட்டுகளுக்கு பதிலளித்த திமுக முன்னாள் எம்பி ஆர்.எஸ். பாரதி, "இன்னும் 15 நாட்களில் தமது குற்றச்சாட்டுக்கு உரிய ஆதாரங்களை அண்ணாமலை வழங்காவிட்டால், திமுக தலைவர்கள் அனைவரும் மாநில அளவில் அண்ணாமலைக்கு எதிராக நீதிமன்றத்தில் வழக்கு தொடர்வார்கள். அவர் தொடர்ந்து நீதிமன்றங்களில் ஆஜராக வேண்டி வரும்" என்றும் எச்சரித்தார்.

அதானி குறித்த ஹிண்டன்பர்க் அறிக்கை மற்றும் ஆருத்ரா ஊழல் ஆகியவற்றில் இருந்து கவனத்தை திசை திருப்பவே அண்ணாமலை முயற்சிக்கிறார் என்றும் குற்றம்சாட்டினார் ஆர்.எஸ். பாரதி.

ஏமாற்றத்தில் முடிந்த பரபரப்பு

இது குறித்து அண்ணாமலையிடம் கேட்டதற்கு, "இப்போது பட்டியலின் முதல் பகுதி மட்டுமே வெளியாகியுள்ளது. மேலும் மூன்று பகுதிகள் அடுத்தடுத்து வெளியிடப்படும். தற்போதைக்கு நேரடி சொத்துகள், குற்றம்சாட்டப்பட்ட நபர்கள் தொடர்புடைய நிறுவனங்களின் பங்குகள் விவரத்தை வெளியிட்டுள்ளோம். உலக அளவில் எப்படி திமுக மிகப்பெரிய பணப் பரிவர்த்தனை தொழிலை விரிவுபடுத்தியுள்ளது என்பதை வெளிப்படுத்துவதே எங்களின் நோக்கம்," என்று கூறினார்.

விமர்சிக்கும் செயல்பாட்டாளர்கள்

சவுக்கு சங்கர்
படக்குறிப்பு,

சங்கர், சவுக்கு ஆன்லைன் இணையதள ஆசிரியர்

இந்த நிலையில், அண்ணாமலை வெளியிட்ட பட்டியல் தொடர்பாக, ஊழல் தகவல்களை வெளியிடும் இடித்துரைப்பாளர்கள் (விசில் ப்ளோயர்ஸ்) சிலர் விமர்சித்துள்ளனர்.

அண்ணாமலையின் குற்றச்சாட்டுகள் பொத்தம் பொதுவானவை என்று 'சவுக்கு' இணையதளத்தை நடத்தி வரும் அதன் ஆசிரியரும் லஞ்ச ஒழிப்புத்துறை முன்னாள் ஊழியருமான சங்கர் தெரிவித்துள்ளார்.

"ஆளும் ஆட்சியாளர்களுக்கு எதிராக மிகப்பெரிய ஊழல் பட்டியலை அண்ணாமலை வெளியிடுவார் என எதிர்பார்த்தோம். ஆனால், பொதுவெளியில் கிடைக்கக் கூடிய தரவுகளை ஆவணங்கள் போல பேட்டி கொடுத்து ஏமாற்றத்தை அளித்து விட்டார் அண்ணாமலை," என்கிறார் சங்கர்.

என்ன செய்திருக்க வேண்டும்?

அண்ணாமலை பிபிசி

நியாயமாக பார்த்தால் அண்ணாமலை தான் கட்டியிருந்த கைகடிகாரம் தனிப்பட்ட விஷயம் என ஆரம்பத்திலேயே சொல்லி இருக்கலாம். அவர் முறைப்படி எழுப்பியிருக்க வேண்டிய பிரச்னை, முதலமைச்சர் மு.க. ஸ்டாலின் கையில் கட்டியிருக்கும் கைகடிகாரம் பற்றியதுதான். காரணம் அது பல கோடி மதிப்பிலானது. ஸ்டாலின், முதல்வர் பதவி வகிக்கும் முன்பு அந்த கைகடிகாரத்தை அணிந்திருக்கவில்லை. அதன் பிறகு அது பரிசாக வழங்கப்பட்டிருக்கலாம். ஆனால், எங்கும் அது கணக்கில் காட்டப்படவில்லை.

அரசு பதவியில் இருப்பவர் தனக்கு வரும் பரிசுப் பொருட்களை அரசு கருவூலத்தில் சேர்ப்பது அவரது கடமை. அந்த கைகடிகாரத்தின் பின்னணி பற்றிய விளக்கத்தை முதல்வர் தர அண்ணாமலை வலியுறுத்தியிருக்க வேண்டும்.

ஆனால், அதை எல்லாம் செய்யாமல் ஏதேதோ தகவல்களை வெளியிட்டு நேரத்தை வீணடித்து விட்டார் அண்ணாமலை. அவரது பேட்டி சமூக ஊடக பரபரப்புக்கு மட்டுமே தீனி போடும். அவர் எழுப்பியது மிகப்பெரிய பிரச்னை. ஆனால், அது வெடிக்காத குண்டாக இருக்கிறது," என்று சங்கர் தெரிவித்தார்.

ஆதாரங்களை நிரூபிப்பது சவாலான பணி

அறப்போர் ஜெயராமன்
படக்குறிப்பு,

ஜெயராமன், அமைப்பாளர் - அறப்போர் இயக்கம்

தமிழ்நாட்டில் ஆளும் ஆட்சியாளர்கள் மற்றும் தேர்தல் காலங்களில் வேட்பாளர்கள் தொடர்புடைய சொத்து மதிப்பு, ஊழல் புகார்களை ஆதாரங்களுடன் வெளியிடும் அமைப்பு அறப்போர் இயக்கம். அந்த இயக்கத்தின் அமைப்பாளர் ஜெயராமன் அண்ணாமலையின் 'திமுக ஃபைல்ஸ் வெளியீடு', அடிப்படையில் சட்ட வலுவில்லாதது என்று கூறுகிறார்.

"எங்களுடைய இயக்கம் ஒரு ஊழலை வெளியிடுகிறது என்றால் முதலில் அதை நிரூபிக்கும் ஆவணத்தைத்தான் தேடும். குற்றம்சாட்டப்படும் நபருக்கு அந்த குற்றச்சாட்டில் முகாந்திரம் உள்ளதா என்பதை கிடைத்த ஆவணங்களைக் கொண்டு சரிபார்ப்போம்.

ஆவணங்கள் போதவில்லை என்றால் கூடுதல் தகவல்களை திரட்டுவோம். அப்படி ஆதாரங்கள் திரட்டினால் கூட நீதிமன்றத்தில் அவற்றை நிரூபிப்பது மிகவும் கடினம். அதனால் அண்ணாமலை வெளியிடும் தகவல்கள் அல்லது குற்றச்சாட்டுகள் நம்பகத்தன்மை அற்றதாகிவிட வாய்ப்புள்ளது. 12 வருடங்களுக்கு முந்தைய இந்த விஷயத்தை இதுநாள் வரை ஏன் அவரோ அவரது கட்சியோ கையில் எடுக்கவில்லை? என்று கேள்வி எழுப்புகிறார் ஜெயராமன்.

அடிப்படையில், ஊழல் நடந்ததற்கு முகாந்திரம் இருக்கிறதா என்றும் பார்க்க வேண்டும். முகாந்திரம் இருந்தால்தான் இந்த வழக்கை மத்திய புலனாய்வுத்துறையோ மாநில லஞ்ச ஒழிப்புத்துறையோ விசாரிக்கும். ஊழல் விவகாரத்தில் மத்திய அரசு பணப் பரிவர்த்தனை இடம்பெற்றிருந்து முறைகேடு நடந்திருந்தால் சிபிஐ விசாரிக்க முடியும். இல்லாவிட்டால் மாநில லஞ்ச ஒழிப்புத்துறையே விசாரிக்கலாம்" என்று ஜெயராமன் தெரிவித்தார்.

அதிமுக கருத்து

ஜெயக்குமார்
படக்குறிப்பு,

ஜெயக்குமார், முன்னாள் அமைச்சர்

சென்னை செய்தியாளர் சந்திப்பின்போது, திமுக ஆட்சியில் நடந்த ஊழல் மட்டுமின்றி முந்தைய ஆட்சியில் நடந்த ஊழலையும் வெளிப்படுத்துவோம் என்று அண்ணாமலை கூறியிருந்தார். அப்படியென்றால் திமுக மட்டுமின்றி முன்பு தமிழ்நாட்டில் ஆட்சியில் இருந்த பாஜகவின் கூட்டணியான அதிமுக ஆட்சியையும் அண்ணாமலை குறிப்பிடுவதாகவே கருதப்படுகிறது.

இது குறித்து அதிமுக முன்னாள் அமைச்சர் ஜெயக்குமாரிடம் பிபிசி தமிழ் கேட்டது. அதற்கு அவர், "அண்ணாமலை ஊழல் பட்டியலை வெளியிட்டது எல்லாம் சரிதான். இவரது கட்சிதானே மத்தியில் ஆட்சி செய்கிறது. மாநிலத்தில் ஆளும் கட்சி மீது புகார்கள் இருந்தால் டெல்லியில் புகார் அளித்து சம்பந்தப்பட்ட ஊழல் பற்றி சிபிஐ விசாரணை நடத்தி இவர்களுக்கு எல்லாம் எப்படி சொத்துகள் குவிந்தன என கண்டுபிடிக்க நடவடிக்கை எடுக்கலாமே?" என்று கேட்டார்.

அண்ணாமலை குறிப்பிடும் முந்தைய ஆட்சி ஊழல் கருத்து பற்றி கேட்டதற்கு, "மடியில் கணம் இருப்பவர்கள்தான் இதற்கு எல்லாம் பயப்படுவார்கள். எங்களுக்கு எந்த கணமும் இல்லை. அதனால் எங்களுக்கு அது பற்றி எல்லாம் கவலை இல்லை," என்கிறார் ஜெயக்குமார்.

இது ஆரம்பம்தான் - தமிழக பாஜக

பாஜக
படக்குறிப்பு,

ஏ.என்.எஸ். பிரசாத், தமிழ்நாடு பாஜக முன்னாள் ஊடக பிரிவு தலைவர்

ஆனால், அண்ணாமலை தெரிவித்துள்ளது வெறும் புகார் மட்டுமல்ல, இதுதான் ஆளும் திமுகவுக்கு எதிரான முறைகேடுகளை வெளிச்சத்துக்கு கொண்டு வரும் பாஜகவின் ஆரம்க கட்ட நடவடிக்கை என்கிறார் அந்த கட்சியின் மாநில ஊடகப்பிரிவு முன்னாள் தலைவர் ஏ.என்.எஸ். பிரசாத்.

அண்ணாமலை வெளியிட்ட தகவல்களை வெறும் சொத்து பட்டியல் விவரங்களாக பார்க்கக் கூடாது. அந்த பட்டியலில் தொடர்புடைய நபர்களின் இதற்கு முந்தைய நிதி பின்புலம், அவர்கள் கடந்த 20 வருடங்களில் குவித்த சொத்துகளின் விவரம் அடங்கிய அடுத்த கட்ட பட்டியலையும் அண்ணாமலை வெளியிடுவார் என்கிறார் பிரசாத்.

அண்ணாமலையின் குற்றச்சாட்டுகளை ஏளனம் செய்யும் திமுகவினர், அவர் மீது வழக்கு தொடுப்பது பற்றி எச்சரிக்கும் முன்னர் தங்களுடைய கட்சித் தலைமையின் பழைய நிதி முறைகேடுகள் பற்றிய தகவல்களை ஆராய்ந்து உண்மையை புரிந்து கொள்ள வேண்டும் என்றும் கேட்டுக் கொள்கிறார் அவர்.

சட்டத்துக்கு எது தேவை?

நீதித்துறை

பட மூலாதாரம்,GETTY IMAGES

இந்தியாவில் மத்திய அரசு, மத்திய அரசுத்துறைகள் தொடர்புடைய ஊழல், முறைகேடு புகார்கள் மீது நடவடிக்கை எடுக்க பரிந்துரைக்கும் அதிகாரத்தை மத்திய கண்காணிப்பு ஆணையம் பெற்றுள்ளது. இது தவிர, மத்திய அரசு, உயர் நீதிமன்றங்கள், உச்ச நீதிமன்றம் மூலமாகவும் ஒரு வழக்கை மத்திய புலனாய்வுத்துறை விசாரிக்க முடியும் என்கிறது மத்திய கண்காணிப்பு ஆணைய இணையதளம்.

இதுவே மாநில அரசு என வரும்போது, மாநில அரசு வரம்புக்கு உள்பட்ட துறைகள் தொடர்பான புகார்கள் மீது நடவடிக்கை எடுக்க மாநில கண்காணிப்பு மற்றும் ஊழல் தடுப்பு இயக்குநரகரத்துக்கு அதிகாரம் உள்ளது. அதுவே, மாநில முதல்வர், மாநில அமைச்சர்கள் உள்ளிட்டோர் மீதான ஊழல் அல்லது முறைகேடு புகார்கள் என்றால் அதற்கு முதலில் அரசாங்கம் அல்லது உயர் நீதிமன்ற உத்தரவு மூலமே இந்த இயக்குநரகத்தால் விசாரிக்க முடியும்.

ஒரு மாநிலத்தில் மத்திய-மாநில அரசுகள் சேர்ந்து செயல்படுத்தும் ஒரு மத்திய அல்லது பொதுத்துறை திட்டத்தில் மத்திய அரசின் நிதி 50 சதவீதத்துக்கும் அதிகமாக இருக்கும்பட்சத்தில் அதில் முறைகேடு புகார்கள் அளிக்கப்பட்டால், அதன் மீதான விசாரணையை மத்திய அரசு நேரடியாக அதன் புலனாய்வுத்துறை மூலமாகவோ அல்லது மாநில அரசுடன் ஆலோசித்து மாநில லஞ்ச ஒழிப்புத்துறை மூலமாகவோ விசாரிக்க நடவடிக்கை எடுக்க முடியும்.

அந்த திட்டத்தில் முதல்வர், மாநில அமைச்சர்கள், ஐஏஎஸ், ஐபிஎஸ் உள்ளிட்ட உயரதிகாரிகளுக்கு தொடர்பு இருப்பதாக புகார் எழுந்தால் அது பற்றிய தகவல் உயர் நீதிமன்றத்தில் வழக்கு தொடருவதன் மூலமோ மாநில ஆளுநரிடம் புகார் தருவதன் மூலமோ தெரிவிக்கப்பட்டால், குற்றச்சாட்டுகள் மீதான அடிப்படை முகாந்திரத்தின் அடிப்படையில் மத்திய புலனாய்வு விசாரணைக்கு நீதிமன்றம் அல்லது ஆளுநர் உத்தரவிடலாம்.

Detail